Heb 8 | BOJ | STEP | Ariya ijo anjam di aqa utru agiende. Atra tamo kobaquja deqaji agi unu. Di Yesus qujai. A laŋ qureq oqsiq Qotei siŋgila koba ti unu qaji aqa baŋ woq di awejunu.

Hebrews 8

Yesus a laŋ qureq dia atra tamo kobaquja unu

1 Ariya ijo anjam di aqa utru agiende. Atra tamo kobaquja deqaji agi unu. Di Yesus qujai. A laŋ qureq oqsiq Qotei siŋgila koba ti unu qaji aqa baŋ woq di awejunu. 2 A atra tal laŋ qureq di unu qaji di miligiq giloqnsiqa laŋ qaji iŋgi iŋgi Qotei atraiyeqnu. Atra tal di Qotei aqa segi tal bole. Tamo bei na atosai. Tamo Koba Qotei a segi na atej unu.

3 Atra tamo kokba naŋgo wau di niŋgi qalie. Naŋgi iŋgi iŋgi osi boqnsib Qotei atraiyeqnub. Deqa Yesus a dego atra tamo kobaquja sosiqa aqa segi jejamu osiq Qotei atraiyej. 4 Yesus a mandamq endi so qamu a atra tamo sosai qamu. Di kiyaqa? Livai naŋgi segi mandamq endia atra tamo sosib iŋgi iŋgi Qotei atraiyeqnub. Agi dal anjam a nami degsi marej. 5 Livai naŋgi gaigai mandam qaji atra tal miligiq giloqnsib waueqnub. Atra tal di laŋa mandam qaji tal. Tal di laŋ qure qaji atra tal laŋa sigitejunu. Agi Moses a nami tal di atqa laqnaqa Qotei na tal sigitosiqa Moses osoryonaqa degsi gereiyej. Agi Qotei na Moses endegsi minjej, “E mana goge dia atra tal sigitosim ni osormem. Ni di geregere dauryosim atra tal aqa iŋgi iŋgi kalil degsi gereiyime.” Qotei na nami Moses degsi minjej. 6 Ariya bini Yesus a atraiyo wau ojeqnu di wau tulaŋ bolequja. Aqa wau dena atra tamo namij naŋgo wau tulaŋ buŋyejunu. Di kiyaqa? Yesus a Qotei aqa anjam bunuj siŋgilatqa osiqa Qotei ti iga ti gago ambleq di tigelejunu. Deqa anjam bunuj dena anjam namij di tulaŋ buŋyejunu. Iŋgi iŋgi Qotei a Yesus aqa baŋ na iga egwa marej qaji dena iŋgi iŋgi Qotei a Moses aqa baŋ na iga egwa marej qaji di tulaŋ buŋyejunu.

Anjam bunuj a na anjam namij tulaŋ buŋyejunu

7 O was qu, niŋgi are qaliye. Anjam namij dena iga aqaryaigwa kere qamu Qotei na olo dal anjam bunuj atqa marosai qamu. 8 Ariya Qotei a na Israel tamo uŋgasari naŋgo une babtetnjrsiqa endegsi marej, “Tamo Koba Qotei a marqo, ‘Niŋgi quiye. E bati atonum unu. Bati di brantimqa e anjam bunuj atsiy siŋgilatqai. Osiy anjam bunuj di Israel naŋgi ti Juda naŋgi ti minjrit naŋgi qusib dauryqab. 9 Ijo anjam bunuj di anjam namij dego sai. Agi nami e na Israel naŋgo moma naŋgi Isip sawaq dena joqsim gilsim torei Sainai manaq oqsim dia ijo anjam namij naŋgi enjrem. Ariya naŋgi ijo dal anjam di dauryqa uratosib gotraŋyoqneb deqa e na kamba naŋgi qoreinjrem. 10 Ariya anjam bunuj agiende. Bati bei brantimqa e na ijo dal anjam kalil osiy Israel tamo uŋgasari naŋgo areqaloq di atsiy siŋgilatqai. Osiy naŋgo are miligiq di dego neŋgreŋyqai. Deqa e naŋgo Qotei soqnit naŋgi ijo segi tamo uŋgasari sqab. 11 Sosib bati deqa naŋgi kalil e qa geregere qalieqab. Deqa naŋgi olo bunuqna naŋgo was naŋgi endegsi minjrqasai, “Niŋgi Tamo Koba Qotei qa qalieoiye.” Degsi minjrqasai. Naŋgi kalil e qa qalieqab. Tamo ñam ti tamo ñam saiqoji naŋgi ti kalil e qa qalieqab. 12 Di kiyaqa? E naŋgi qa dulosiy naŋgo une kobotetnjrqai. Deqa bunuqna e naŋgo une qa olo are qalqasai.’” Qotei a nami degsi marej.

13 Agi Qotei a marej, “E anjam bunuj atqai.” A degsi marej deqa iga qalieonum, anjam a nami atej qaji di olo namijej. Deqa anjam di a sokobaiyqasai. A sokiñalayosim torei koboqas.